且慢！此《我對青春無悔》不是黑澤明1946年那部電影、不是梁朝偉1983年那套劇集、也不是灣仔劇團多年來多次重演的那齣話劇。此乃阿一仝人為該本部友好大會集體創作，今回由小弟參與改篇及導演。據非正式統計，是多年來主題最深化的一次學會演出。有機會跟一大班自己不認識的青年部合作，可以好好磨練之餘，更令我想起大學搞戲的日子......雙倍挑戰是，要做好成件事之上，更要讓每一位參加者有最大發揮和實感。整個製作最出色的，要算是阿Man拍攝的「嬌拔最痛」街頭錄像，排練時我們忽然想到，勢估唔到他 / 她們真的翌日晨早出來做到......好！
很喜歡此劇的構思，三對人，穿梭五十年的成長日子，交織出不言而喻的友情及若有若無的愛情，以青春的信念和使命追尋生之所求－－幸福之路。很回味Auntie芭芭拉行路上天山的一段戲，寫之前自己對天山和絲路一無所知，只知道負責人很想表達長者也可行絲路的氣魄。於是搜集了一些資料，嘗試感受嘗試想像，最終寫了這段很露，但自己很喜愛的台詞......也慶幸由一位很有天份的妹妹演出來（之前在APA上過劇本改篇班真的有些作用呢！）
夏：真係服咗你囉，七十幾歲人仲去絲路。
芭：後生個陣時冇機會吖嘛，不過唔等於永遠做唔到喎。我記得池田先生講過，「少年不得志唔係問題，年輕嘅時候點失敗都可以挽回」。今次終於去得成絲路，親眼見到天山，達成咗咁多年嚟嘅心願，我想喺下次開會嘅時候講吓呀。
暉：好！到時同Victor雙打囉！（眾贊成）
Victor： 芭芭拉個體驗咁新鮮熱辣，不如宜家講啲俾我哋聽先啦！
眾: 好呀！
芭：hm……咁不如講吓騎馬上天山雪線嘅感受啦。天山雪線嘅位置喺海拔三千幾米，去之前幾日就要開始食抗高山症嘅藥架喇。
京：嘩，真係唔係講玩架喎。
芭：係呀，我哋沿途要經過幾段河流，條山路好崎嶇，不斷上上落落，連隻馬都行得有啲吃力。山路走咗一大半，天氣就越嚟越凍，帶去嘅衫都著晒上身，個個好似成隻糉咁。騎馬騎咗幾個鐘頭之後，我哋去到一個好斜嘅山坡，開始行路上雪線，真係好考體力架。其實喺嗰個位置已經可以望到天山架喇，山頂舖滿晒白雪，好似喺雲層之間「喱」埋咁，嗰一刻，特別覺得呢個世界真係好大。我哋沿住山徑跨越一個又一個山脈，每次以為好快到嗰陣，點知眼前又出現另一遍山脈，無窮無盡咁嘅。行咗三個鐘頭之後，雙腳都麻晒，望望手錶計一計時，如果一個鐘頭之內唔開始回程，就趕唔切喺太陽落山前翻到營地，咁就危險咯……
孫：於是你哋被迫放棄呀？
芭：Susan，你估吓？
（Susan在思考，但不敢妄下判斷，Victor見她猶豫，於是搶答）
Victor：比著五十年前我認識嘅芭芭拉就一定冇放棄喇，仲有一個鐘頭先分勝負嘛！
芭：我老公問我，仲有一個鐘，頂唔頂得順。我答佢，同你一齊行咪頂得順囉。（甜絲絲）之後我問翻佢：「點解要攀山？」
眾：因為嗰度有山吖嘛。
芭：就係就簡單。我哋攀山，因為想見到山後面嗰座山，諗翻起呢種咩困難都唔怕嘅人間革命精神，成個人輕咗，條路亦都易行得多喇。
孫：之後你哋一直上到雪線呀？
芭：咁又未，始終有一段距離，就留翻俾阿仔同阿女第時去挑戰吓囉。不過我哋行多大半個鐘之後，去到一個好好嘅位置，冇遮冇擋咁睇到天山嘅仙境，又可以望到腳下面好似塊鏡咁嘅天池，我哋不其然感動到喊咗出嚟，嗰種同自然咁近嘅感覺，真係唔識得形容，幾辛苦都值得。
夏：我諗呢，有過呢種感覺嘅人，一定唔會亂咁破壞自然環境架。
芭：係啦！之後我哋近距離同天山影咗幾張相，學池田先生同自然對話吖嘛，之後就同天山先生講拜拜“lu”。
Rudy：好精彩嘅體驗呀。（眾認同） 山路愈崎嶇，去到山頂嘅時候就會更加喜悅。
暉：冇錯呀！打從心裏面確立絕對幸福境涯嘅人，將身邊嘅困難當作成長嘅跳板，以強勁嘅生命力悠然克服逆境。好似體力充沛嘅人，即使揹住稍重嘅行李，亦都能夠從容不迫咁攀山，享受沿路嘅美景！
Victor：果然五十年不變，教學第一嘅暉哥。
芭：唔該晒，多謝你幫我諗埋個咁好嘅總結呀吓！
孫：Auntie芭芭拉呀，你有冇帶啲相畀我哋睇呀？
芭：梗係有啦！（芭拿出相來，眾低頭看相，如第一場尾段一模一樣，不過今次開始睇相時連Rudy和Victor都專心）嗱，呢幅咪就係我頭先講嘅天池囉，水質清澈都不得了，雪山嘅倒影喺湖上面，真係好似一面鏡子咁。當地人話呢，傳說入面嘅天池就係王母娘娘梳妝台上嗰塊鏡，而圍繞雪山嘅雲霧，就係佢啲靚衫喎。
（眾細心傾聽。Victor則想起將鏡子還給Rudy，從袋中拿出來）
Victor：Rudy，你記唔記得呢樣嘢呀？
Rudy：呢塊鏡……
Victor：就係你五十年前你叫我照吓自己個樣反省吓嗰塊鏡呀。
Rudy： 吓，你keep咗五十年呀？
Victor：係呀，係你用呢塊鏡令我爬翻起身架，我……
Rudy：（打趣道）老老實實喇，你仲keep住我啲咩架？
Victor：（想一想，情深感激）你每一句鼓勵囉，我永遠都會keep住……
（二人一起照鏡，心有靈犀）
（音樂起，是杜麗莎的〈仍然記得嗰一次〉）
（畫面投射出眾人一幕幕成長片段和生活感言）
P.S. 謝謝芭芭拉阿東阿暉各位台前幕後台下每一位的信任和支持，呢次經驗我永遠都會keep住......
